Calvary Burmese Church le Sizang Mi

November 20, 2011 ni in, Calvary Burmese Church Washington DC pawlpi ah, Christian Family Sunday taw kisai in hunzakna khat nuamtak in kivawt hi. Tua biakpiak kikhopna ah, Calvary Burmese Church ah akikhawm mi te sung pan minam atam bel teng ahi, Kawl, Kachin, Karen le Chin ci in a pi 4 teng in amate kam tek taw TOPA pokna nei uh hi. Chin atu in Zomi a om thathei teng pawl khat in Sizang Lapi taw Topa pokna nei hi.

Washington DC (USA te ii capital khuapi) sia American kumpi te ii zum tona, capital khuapi hi aa, Washington khuapi sung ah Kawl ngam pan pawlpi sia Calvary Burmese Church ngawl a dang (Chin, Kachin, Karen..etc pawlpi) khat zong om ngwal hi. 2012 February tha ciang Pawlpi aki pat zawk  kum 15 cing tu hi. Hi Pawlpi akipat ciil lai in mi 18 bang taw akipan hi aa, tua teng sungpan 10 val (a lang val) sia Sizang mi hi.

Tulaitak pawlpi sung Sizang mi panmun a len 5 ki om aa, Syama Ngiak Ngo Neam (pastor), Syama Awi Khawm Huai (pastor & Church School teacher), Pa Lian Kam (Advisor), Pa Thawng Khan Cin (Chairman) Lia Man Khan Dim (secretary) le Pa Nang Khan Pum (EC member) te ahi hi. A bosa hun sung ah Pa Khai Cin Pau (tulaitak SBMC chairman) in Vice Chairman, Pa Mang Khawm Pau (tulaitak SBMC assistant Secretary)in Vice Chairman le Tresurer seam ngei aa, Pa Ngo Dal le Pa Khup Khan Pau in Vice Chairman seam ngei si hi.

Calvary Burmese Church innteak ahi Calvary Baptist Church ii taang thu sung pan a heak nop huai thu pawl khat son tu in hi leang, Pawlpi akipat zawk kum 150 cing zo aa, hi biakinn sung ah American Baptist Churches USA ki phuan hi ci te le, kawl ngam ah ngupna le lungdamna thu son tu in hong pai, Rev. Dr. Judson sia kawl ngam hong pai lai hi pawlpi in support aa, Judson sia Calvary Baptist Church ii missionary khat hi ci sia zong ih nusia thei baw tu hi.

Tulaitak pawlpi keam Sya (Senior pastor) sia Rev. Saw Ler Htoo hi. Hi pawlpi taw kisai a cing zaw in ih sim nuam le, pawlpi website Calvary Burmese Church ah kisim thei hi.